Dyfarnwyd cymrodoriaethau i Adrian Hurley a Calvin Eden
21/10/2026Cyflwynwyd Cymrodoriaethau Coleg Penybont 2026 yn ystod ein Seremonïau Graddio Addysg Uwch a gynhaliwyd ar ein Campws Pencoed.
Anrhydeddwyd Adrian Hurley yn ystod seremoni gyntaf y dydd, i gydnabod ei wasanaeth i’r diwydiant adeiladwaith ac i hyfforddiant proffesiynol.
Mae Adrian wedi ymroi mwy na phedwar degawd i’r diwydiant adeiladwaith, gan feithrin gyrfa nodedig ym maes peirianneg gwasanaethau adeiladu a hyfforddiant proffesiynol. Mae Adrian wedi bod yn Rheolwr-gyfarwyddwr F P Hurley ers 2017, ac mae’n parhau i arwain y cwmni wrth fuddsoddi yn ei bobl a chyflawni prosiectau adeiladu cymhleth ledled y rhanbarth. Mae Adrian wedi gwneud cyfraniad sylweddol at y proffesiwn peirianneg adeiladu ehangach trwy ei waith gyda’r Gymdeithas Gwasanaethau Peirianneg Adeiladu (CGPA), gwasanaethodd fel Llywydd CGPA yn 2024, ac mae’n parhau i wasanaethu ar y Bwrdd ac ar Bwyllgor Llywio Cymru CGPA. Mae Adrian hefyd wedi helpu i hyrwyddo dyfodol mwy cynhwysol i’r sector, gan annog y genhedlaeth nesaf o fenywod i fanteisio ar y cyfleoedd sydd ar gael iddyn nhw.
Yn ail seremoni’r dydd, anrhydeddwyd Calvin Eden i gydnabod ei waith yn eirioli dros bobl ifanc ac yn datblygu cenedlaethau’r dyfodol.
Mae Calvin yn entrepreneur, siaradwr ac eiriolwr dros bobl ifanc sydd wedi ennill gwobrau. Fe yw cyd-sylfaenydd a Phrif Weithredwr Loud Speaker, sefydliad sy’n ymroddedig i rymuso pobl ifanc trwy feithrin hyder, datblygu sgiliau cyfathrebu, gwydnwch a datblygiad personol. Ers sefydlu Loud Speaker, mae Calvin a’i dîm wedi gweithio gyda mwy na 300,000 o bobl ifanc ledled y DU, gan ddarparu profiadau mewn ysgolion, colegau a chymunedau.
Mae gwaith Calvin wedi cael ei gydnabod yn genedlaethol; cafodd ei enwi’n Entrepreneur Pwrpas y Flwyddyn yng Ngwobrau Entrepreneuriaid Prydain Fawr, ac enillodd Wobr Gwneud Gwahaniaeth y BBC. Trwy ei waith eirioli, ei arweinyddiaeth a’i ymrwymiad at ddatblygu cenedlaethau’r dyfodol, mae Calvin yn parhau i helpu pobl ifanc i ddod o hyd i’w llais, gweld eu potensial, a magu’r hyder i ddefnyddio’r ddau.
Cyflwynodd Tomos Owen, Cadeirydd Corff Llywodraethu Coleg Penybont, y Cymrodoriaethau i Adrian a Calvin.
Roedd yn bleser dathlu cyflawniadau Adrian a Calvin yn ein seremonïau graddio. Mae cyfraniad Adrian at y diwydiant adeiladwaith a’i ymrwymiad at ddatblygu gweithwyr proffesiynol medrus, ynghyd â gwaith Calvin i helpu pobl ifanc i feithrin hyder a gweld eu potensial, yn dangos gwerth rhannu gwybodaeth a buddsoddi mewn eraill. Rydyn ni’n falch o gydnabod y gwahaniaeth maen nhw’n parhau i’w wneud, a gobeithiwn y bydd ein graddedigion yn cael eu hysbrydoli gan deithiau’r cymrodyr wrth iddynt ddechrau pennod nesaf eu gyrfaoedd eu hunain.
Viv Buckley, Pennaeth a Phrif Weithredwr Coleg Penybont
Mae ein Seremoni Raddio Addysg Uwch yn un o uchafbwyntiau’r flwyddyn, gan ddathlu cyflawniadau ein myfyrwyr dros y flwyddyn academaidd ddiwethaf. Roedd yn bleser croesawu Dr Louise Bright, Dirprwy Is-ganghellor dros Fenter, Ymgysylltu a Phartneriaethau ym Mhrifysgol De Cymru, i gydnabod y rhai oedd yn graddio. Yn ogystal â staff y Coleg, roedd Llywodraethwyr, Cymrodyr Coleg Penybont a Chris Elmore AS yn bresennol yn y digwyddiad. Hefyd mynychodd y Cynghorydd Kyle Duggan, Dirprwy Faer Cyngor Tref Maesteg, a’r Cynghorydd John Butcher, Maer Cyngor Tref Pencoed, ynghyd â’u gwesteion, i ddathlu cyflawniadau’r myfyrwyr.
