Myfyrwyr Coleg Penybont ar y ffordd i WorldSkills Shanghai 2026
31/03/2025Mae pump o fyfyrwyr a phrentisiaid Coleg Penybont yn cychwyn ar daith sydd ond yn digwydd unwaith mewn oes, mewn ymdrech ddewr i wneud y DU yn falch ar y llwyfan rhyngwladol yng Nghystadleuaeth nesaf WorldSkills. Yn cael ei adnabod yn ‘Gemau Olympaidd Sgiliau’, fe’i cynhelir yn Shanghai rhwng 22 a 27 Medi 2026.
Y myfyrwyr a’r prentisiaid, a’u meysydd cystadlu, yw:
- Melody Cheung, Dylunio Graffeg
- Jac Brisland, Iechyd a Gofal Cymdeithasol
- George Hedges (prentis yn Sony UK TEC), Aled Gore a Morgan Leyshon (prentisiaid yn Renishaw), Integreiddio Systemau Robotiaid
Mae WorldSkills UK, mewn partneriaeth â Pearson, cwmni dysgu gydol oes y byd, wedi cyhoeddi y bydd y myfyrwyr yn ymuno â’i raglen hyfforddiant dwys 18 mis. Ar ôl rhagori yn Rowndiau Terfynol Cenedlaethol WorldSkills UK, bydd y myfyrwyr yn anelu at gael eu dewis ar gyfer y tîm a fydd yn cynrychioli’r DU yng nghystadleuaeth WorldSkills yn Shanghai. Mae’r myfyrwyr wedi cael eu cefnogi gan dîm ymroddedig ac angerddol o diwtoriaid a mentoriaid.
Dyma’r tro cyntaf i Tsieina gynnal cystadleuaeth fawreddog WorldSkills. Bydd y digwyddiad yn gweld 1,500 o bobl ifanc yn teithio i Shanghai o dros 80 o siroedd i gystadlu mewn disgyblaethau sgiliau technegol o beirianneg, gweithgynhyrchu a thechnoleg i feysydd creadigol, digidol a lletygarwch o flaen cynulleidfa o 250,000 o bobl.
Mae arbenigwyr byd-eang yn ystyried cystadleuaeth WorldSkills fel y prawf pennaf o allu cenedl i ddiwallu anghenion sgiliau’r dyfodol. Fe’i mynychir gan gynrychiolwyr y llywodraeth, addysgwyr a chyflogwyr blaenllaw o bob rhan o’r byd.
Mae WorldSkills UK yn defnyddio ei gyfranogiad yng nghystadleuaeth ryngwladol WorldSkills i hyrwyddo’r rhagoriaeth sgiliau ledled y DU, a thrwy weithio gydag addysg, diwydiannau a llywodraethau’r DU mae’n gwreiddio safonau hyfforddi o’r radd flaenaf ar draws y sector sgiliau. Mae hyn yn helpu i ateb y galw am weithlu medrus iawn mewn sectorau hanfodol gan gynnwys peirianneg, gwasanaethau digidol, gweithgynhyrchu ac adeiladwaith.
“Rwy’n falch iawn o Melody, Jac, George, Aled a Morgan. Mae cael eu dewis ar gyfer y rhaglen hyfforddi hon yn rhyfeddol, ac mae’n wir yn gyfle sydd ond yn digwydd unwaith mewn oes. Maen nhw eisoes wedi arddangos eu sgiliau rhagorol, yn ogystal â phenderfyniad ac ymroddiad, a byddwn ni’n eu cefnogi nhw bob cam o’r ffordd ar y daith gyffrous sydd o’u blaenau nhw.”
Viv Buckley, Pennaeth a Phrif Swyddog Gweithredol
Pearson yw partner swyddogol Tîm y DU ar gyfer WorldSkills yn Shanghai, yn dilyn partneriaeth lwyddiannus yn WorldSkills 2024 yn Lyon.
“Llongyfarchiadau i fyfyrwyr a phrentisiaid Coleg Penybont ar gael eu dewis ar gyfer ein rhaglen hyfforddi yng nghystadleuaeth WorldSkills 2026 yn Shanghai. Ynghyd â’r aelodau eraill ar ein rhaglen, byddan nhw’n datblygu’r sgiliau cywir i hybu twf busnes ar draws ein heconomi. Gyda WorldSkills yn cael ei gynnal yn Shanghai y flwyddyn nesaf, mae’n darparu llwyfan gwych i ni weithio’n agos gyda Tsieina, lle rydym yn gwybod bod rhagoriaeth sgiliau yn flaenoriaeth, i gydweithio, arloesi a dysgu gan y gorau yn y byd.”
Ben Blackledge, Prif Weithredwr, WorldSkills UK
