Gwnewch eich marc
Mae bod yn bresennol yn eich gwersi yn hanfodol i chi lwyddo yn eich astudiaethau, er ein bod yn deall weithiau na ellir osgoi bod yn absennol.
Mae llawer o fanteision i fynychu’r Coleg a fydd yn eich paratoi’n dda ar gyfer y dyfodol. Mae’r rhain yn cynnwys:
- Ennill graddau da a chwblhau eich cwrs
- Cyfleoedd ar gyfer datblygiad proffesiynol pellach a chyngor gyrfaoedd
- Gwneud ffrindiau am oes
- Datblygu sgiliau cymdeithasol a theimlo’n rhan o gymuned
- Datblygu sgiliau craidd y mae cyflogwyr yn galw amdanynt
- Cymryd rhan mewn gweithgareddau cyfoethogi difyr ar y campws
Rydyn ni am i chi fod y cyfan y gallwch fod, yn y Coleg a thu hwnt. Rydyn ni wedi buddsoddi yn eich dyfodol ac, yn gyfnewid am hynny, gofynnwn i chi gydymffurfio â’n Cod Dinasyddiaeth, lle mae “Bod yn Barod” yn un rhan ohono. Mae hyn yn golygu paratoi ar gyfer gwersi a’u mynychu nhw.
Os ydych chi’n teimlo’n sâl neu’n methu â dod i’r Coleg, anfonwch e-bost at absence@bridgend.ac.uk neu ffoniwch 01656 302 302 cyn dechrau’r diwrnod coleg, gan ddarparu’r wybodaeth ganlynol:
- Eich enw
- Rhif myfyriwr
- Rheswm am yr absenoldeb
- Pryd rydych chi’n disgwyl bod nôl yn y Coleg
Mae angen rhoi gwybod am absenoldebau o fewn 2 diwrnod gwaith.
Mae presenoldeb da yn orfodol i bob myfyriwr sy’n derbyn cyllid gan y llywodraeth i fynychu’r coleg (e.e. Lwfans Cynhaliaeth Addysg, Grant Dysgu Llywodraeth Cymru, ac ati). Bydd absenoldebau rheolaidd yn arwain at atal eich taliadau nes bydd presenoldeb yn gwella.
Bydd taliadau yn parhau ar gyfer:
- Salwch – hyd at 1 wythnos cyn belled â’ch bod wedi rhoi gwybod i Wasanaethau Myfyrwyr. Ar ôl 1 wythnos, bydd angen nodyn gan eich meddyg. Ar ôl 2 wythnos, bydd eich absenoldeb yn cael ei ystyried yn salwch hirdymor ac ni fydd taliadau pellach yn cael eu gwneud.
- Apwyntiadau meddygol – mae angen dangos cardiau apwyntiad i Wasanaethau Myfyrwyr.
- Apwyntiadau eraill megis profion gyrru, cyfweliadau prifysgol – rhaid dangos tystiolaeth i Wasanaethau Myfyrwyr.
- Angladd – caniateir i chi fod yn absennol ar ddiwrnod yr angladd ar gyfer aelodau agos o’r teulu.
Ni fydd taliadau’n cael eu gwneud mewn achosion o wyliau, absenoldebau heb eu hadrodd, neu absenoldebau salwch niferus (mwy na 3 achos o salwch mewn tymor).
Mae’r Coleg yn lle gwych i benderfynu ar eich camau nesaf. Os nad ydych yn siŵr ai’r cwrs rydych chi arno yw’r un i chi, mae ein Tîm Gwasanaethau Myfyrwyr wrth law i drafod yr opsiynau sydd ar gael i chi. Cysylltwch â nhw drwy e-bostio hello@bridgend.ac.uk
Os ydych chi’n cael trafferth gydag anhawster neu lwyth gwaith eich cwrs, peidiwch â dioddef yn dawel. Rydym yn argymell eich bod yn siarad â’ch tiwtor yn y lle cyntaf i weld sut y gallant eich helpu. Yna byddant yn gallu trefnu cymorth pellach os oes angen.
Mae gan nifer o’n myfyrwyr gyfrifoldebau gofalu y tu allan i’r Coleg ac rydym yn cynnig pecyn cymorth i helpu, gan gynnwys caniatâd i ddechrau gwersi’n hwyr a gorffen yn gynnar os oes angen. I roi gwybod i’r Coleg am eich sefyllfa ac i ddysgu sut y gallwn helpu, cysylltwch â lles@bridgend.ac.uk.
Mae ein Tîm Gwasanaethau Myfyrwyr ymroddedig ar gael i helpu myfyrwyr gydag ystod eang o ymholiadau, gan gynnwys opsiynau cludiant a chyngor ariannol. I sgwrsio ag aelod o’r tîm am eich opsiynau, e-bostiwch hello@bridgend.ac.uk neu ewch i Wasanaethau Myfyrwyr ar gampysau Pen-y-bont a Phencoed.
Os ydych wedi bod yn profi unrhyw fath o ymddygiad gwrthgymdeithasol, ar neu oddi ar y campws, mae ein Swyddogion Diogelu ar gael i’ch cefnogi. Anfonwch e-bost at lles@bridgend.ac.uk neu ewch i un o’r sesiynau galw heibio ar gampysau Pen-y-bont a Phencoed.
Os ydych yn cael trafferth gyda’ch iechyd meddwl a’ch bod yn credu bod hyn yn effeithio ar eich perfformiad yn y Coleg, cysylltwch â’r tîm Lles Myfyrwyr drwy e-bostio lles@bridgend.ac.uk, a fydd wrth law i’ch helpu ac i drafod y cymorth sydd ar gael i chi.
