Gweinidog yr Economi yn cyfarfod â phrentisiaid Coleg Penybont fel rhan o Wythnos Genedlaethol Prentisiaethau
10/02/2023Ymwelodd Gweinidog yr Economi, Vaughan Gething AS, ag Academi Persimmon yn Llanilid ddydd Iau 9 Chwefror fel rhan o Wythnos Genedlaethol Prentisiaethau.
Cyfarfu’r Gweinidog â phrentisiaid Coleg Penybont a chafodd daith o’r academi, yn ogystal ag ymuno â dwy sesiwn addysgu.
Daw ymweliad amserol y Gweinidog yn ystod Wythnos Genedlaethol Prentisiaethau, sy’n codi ymwybyddiaeth o’r sawl fantais o brentisiaethau. Yn gynharach yr wythnos hon, anogodd Gweinidog yr Economi fusnesau i gyflogi mwy o brentisiaid i roi hwb i ddiwydiant Cymru. I annog hyn, cyhoeddodd y Gweinidog y bydd Llywodraeth Cymru yn buddsoddi £366m dros y tair blynedd nesaf i ddarparu tua 125,000 o gyfleoedd prentisiaeth ledled Cymru.
Mynychodd Simon Pirotte, Pennaeth a Phrif Weithredwr Coleg Penybont, yr ymweliad a myfyriodd:
“Rydym yn falch iawn o fod wedi croesawu Vaughan Gething AS i Academi Persimmon ac arddangos y cyfleoedd gwerthfawr y mae ein partneriaeth wedi’u creu i fyfyrwyr. Mae Prentisiaethau’n galluogi i’n myfyrwyr ddatblygu sgiliau hanfodol wrth dderbyn hyfforddiant yn y swydd a, thrwy ein partneriaeth arloesol gyda Persimmon Homes, rydym yn cynnig cyfle i lwybr gyrfa eithriadol i brentisiaid.”
Dechreuodd y fenter ar y cyd rhwng Coleg Penybont a Persimmon Homes yn 2017, gyda phrentisiaid bricwyr i ddechrau. Nawr yn chweched flwyddyn y bartneriaeth, mae Coleg Penybont yn creu cyrsiau unigryw ar draws disgyblaethau adeiladwaith amrywiol i roi’r holl sgiliau sydd eu hangen ar fyfyrwyr i ymuno â’r diwydiant. Trwy addasu cyrsiau i anghenion penodol Persimmon Homes, mae’r Coleg yn gallu’n unigryw llenwi unrhyw fylchau o ran prinder sgiliau.
Dywedodd Andy Edwards, Rheolwr Gyfarwyddwr Persimmon ar gyfer Gorllewin Cymru:
“Mae prentisiaid yn darparu gwerth enfawr i’n busnes wrth iddynt ddod â sgiliau newydd, egni a ffyrdd newydd o weithio.
“Mae’r bartneriaeth gyda Choleg Penybont yn sylfaenol bwysig i ddyfodol ein busnes yn Ne Cymru, ac mae’n ein helpu i sicrhau piblinell tymor hir, cryf a thalentog o brentisiaid lleol. Edrychwn ymlaen at barhau i wella’r Academi a’r amgylchedd dysgu o’r radd flaenaf ar gyfer y genhedlaeth nesaf o weithwyr adeiladwaith yn Ne Cymru.”
Mae’r bartneriaeth rhwng y ddau sefydliad yn parhau i fynd o nerth i nerth, ar ôl creu dros 150 o gyfleoedd swyddi newydd ym maes adeiladwaith ar draws De Cymru eisoes.
