Coleg Penybont yn arwyddo Siarter Tegwch, Amrywiaeth a Chynhwysiant Cymdeithas y Colegau
13/12/2024Mae’r Coleg wedi ailddatgan ei ymrwymiad i feithrin lle dysgu a gweithio diogel a theg gan arwyddo Siarter Tegwch Amrywiaeth a Chynhwysiant Cymdeithas y Colegau. Mae bwriad y siarter yn cyd-fynd yn gadarn â gwerthoedd craidd y Coleg o fod yn bobl-ganolog ac yn gynhwysol, ac mae arwyddo’r siarter yn ddatganiad o fwriad wrth i ni ymdrechu i greu amgylchedd lle gall pawb ffynnu a datblygu ymdeimlad o le a pherthyn.
Rydym yn cydnabod ein dyletswydd a’n cyfrifoldeb i sicrhau bod ein myfyrwyr yn barod ar gyfer bywyd a gwaith mewn byd sy’n amrywiol ac yn gyfoethog o ran persbectif, hanes a gwerth unigol. Rydym wedi ymrwymo i greu gofod lle mae caredigrwydd dynol, cysylltiad a thosturi yn treiddio trwy bopeth a wnawn.
Yn ddiweddar fe gwblhaodd y Coleg adolygiad cynhwysfawr o’i gynllun gweithredu gwrth-hiliaeth, gan weithio gyda myfyrwyr a staff i fyfyrio ar gynnydd a blaenoriaethau’r dyfodol. Mae hyn yn cyd-fynd â gwaith grŵp atebolrwydd Cydraddoldeb, Amrywiaeth a Chynhwysiant y Coleg, sy’n gyfrifol am fonitro, goruchwylio a herio blaenoriaethau ac effaith craidd y Coleg. Mae hyn yn cynnwys ein haliniad â Deddf Llesiant Cenedlaethau’r Dyfodol a’n hymrwymiad i nodau llesiant cenedlaethau’r dyfodol.
Llofnodwyd y siarter yn ffurfiol gan Gadeirydd y Corff Llywodraethu, Emma Adamson, a’r Pennaeth a’r Prif Swyddog Gweithredu, Viv Buckley, yn gynharach yr wythnos hon, gan ddangos ymrwymiad cydweithredol i weithredoedd a bwriad y siarter.
“Mae’r siarter yn cyd-fynd â’n hymrwymiad i feithrin cymuned coleg sy’n barchus, yn ddiogel ac yn dathlu’r gwerth anhygoel a ddaw yn sgil syniadau, persbectif a phrofiadau amrywiol. Sefydliad dysgu ydyn ni, ac rydym yn glir ynghylch ein hatebolrwydd a’n cyfrifoldebau i sicrhau bod gan genedlaethau’r presennol a’r dyfodol y sgiliau a’r profiadau amrywiol sydd eu hangen arnynt i ffynnu a gwneud gwahaniaeth.”
Viv Buckley, Pennaeth a Phrif Swyddog Gweithredol
