Ymgysylltiad rhyngwladol
Gwelwch y Byd Wrth i Chi Astudio yng Ngholeg Penybont
Yng Ngholeg Penybont, bydd gennych gyfleoedd anhygoel i ennill profiadau gwaith a bywyd gwerthfawr dramor. Rydym yn rhoi cyfleoedd i fyfyrwyr deithio’n rhyngwladol, gan brofi bod y sgiliau rydych yn eu dysgu gyda ni yn drosglwyddadwy i unrhyw le yn y byd.
Yn dibynnu ar eich cwrs, gallech gymryd rhan mewn teithiau sy’n benodol i’ch pwnc a fydd yn eich galluogi i gymhwyso’ch dysgu mewn cyd-destun byd-eang, gan roi mantais gystadleuol i chi.
Yn ogystal, mae gan rai myfyrwyr gyfle i fynd ar anturiaethau sy’n newid bywydau i leoedd fel Cambodia, Gwlad Thai, Nepal, India a Pheriw. Mae’r profiadau unigryw hyn yn gydweithrediad â Taith a Chynllun Turing lle byddwch yn chwarae rhan weithredol wrth gyflwyno rhaglenni hanfodol sy’n canolbwyntio ar addysg, iechyd a bywoliaeth. Drwy wneud hynny, ni fyddwch yn dwrist; byddwch yn ddinesydd byd-eang gan wneud gwahaniaeth gwirioneddol yn ein cymunedau partner.
Nepal 2024
Yn 2024, aeth grŵp o 15 o fyfyrwyr a 3 aelod o staff o Goleg Penybont i Nepal ar brosiect cymunedol “Challenges Abroad” a ariannwyd yn llawn. Gan bartneru â Sefydliad Future Sense, arhosodd y tîm yn Bhaktapur, lle gwnaethon nhw ymgolli’n gyflym yn y diwylliant lleol. Prif ffocws y myfyrwyr oedd gweithio gydag Ysgol Uwchradd Shree Aajad i ddarparu gweithdai addysgol deniadol i blant 4 i 16 oed. Roedd y gweithdai hyn yn cwmpasu amrywiaeth o bynciau, o eirfa a gramadeg Saesneg sylfaenol i ysgrifennu creadigol ac origami, gyda’r nod o ysgogi meddwl creadigol a gwella eu sgiliau Saesneg ar lafar ac ysgrifenedig.
Y tu hwnt i’r gwaith yn yr ysgol, cymerodd y grŵp ran hefyd mewn amrywiaeth o weithgareddau diwylliannol, gan gynnwys peintio henna, gweithdai crochenwaith, ac ymweld ag adeiladau arwyddocaol llleol fel Teml y Mwncïod a’r fynachlog. Defnyddiodd dau fyfyriwr eu sgiliau artistig i greu murlun hardd yn un o ystafelloedd dosbarth yr ysgol, gan adael rhodd barhaol. Teimlai pawb yn y tîm fod y profiad yn hynod werth chweil ac roeddent yn credu eu bod wedi gwneud gwahaniaeth gwirioneddol ym mywydau eraill, a hynny i gyd wrth gael croeso cynnes gan eu gwesteiwyr yn Nepal. Rhoddodd y daith gyfle unigryw i fyfyrwyr gamu y tu allan i’w cwmpas cysur, ennill profiad rhyngwladol gwerthfawr, a chyfrannu at brosiect cymunedol ystyrlon.
Cambodia 2024
Ym mis Gorffennaf 2024, aeth 13 o fyfyrwyr a 3 aelod o staff o Goleg Penybont i Cambodia am bythefnos fel rhan o brosiect cymunedol “Challenges Abroad” a ariannwyd yn llawn. Ar ôl taith hir, ymgartrefodd y grŵp yn Battambang, lle y gwnaethon nhw aros. Prif ffocws eu taith oedd cefnogi ysgol leol trwy ddarparu gweithdai addysgol a chymryd rhan mewn gwaith gwirfoddol yn y gymuned. Er gwaethaf tymor y monsŵn, ffynnodd y myfyrwyr, gan ddarparu gweithdai bob dydd a chysylltu â’r plant lleol.
Y tu hwnt i’w gwaith yn yr ysgolion, ymgollodd y tîm yn niwylliant a hanes Cambodia. Treulion nhw eu penwythnos cyntaf yn ymweld â golygfeydd, yn blasu llaeth cneuen goco ffres, ac yn gweld chwe miliwn o ystlumod yn gadael ogof leol gyda’r cyfnos. Ymwelon nhw hefyd â safleoedd Phnor Sampov a Killing Field i ddysgu am hanes anodd y wlad dan rym Khmer Rouge. Cynigiodd y daith hon gyfle anhygoel i fyfyrwyr gael effaith gadarnhaol ar y wlad wrth ennill dealltwriaeth ddofn o ddiwylliant newydd.
Gwlad Thai 2024
Yn 2024, aeth grŵp o naw myfyriwr o Goleg Penybont, yn cynrychioli amrywiaeth o feysydd gan gynnwys Gwasanaethau Cyhoeddus, Peirianneg, Chwaraeon, y Cyfryngau Creadigol, a Gwyddoniaeth Fforensig, ar daith pythefnos i Wlad Thai. Gwnaeth cyllid gan raglen Taith y daith yn bosibl ac fe’i trefnwyd mewn partneriaeth â Challenges Abroad a FutureSense. Roedd y myfyrwyr yng nghwmni eu darlithwyr, Lowri a Jon, ac roedd ganddynt genhadaeth allweddol: cymryd rhan mewn gwaith cymunedol a phrofiadau diwylliannol.
Dechreuodd antur y tîm yn Chiang Mai, lle treulion nhw eu dyddiau cyntaf yn cynllunio ac yn paratoi ar gyfer gweithdai y bydden nhw’n eu darparu mewn ysgolion lleol. Cawsant hefyd y cyfle i ymgolli yn y diwylliant lleol trwy ymweld â themlau anhygoel a mwynhau machlud haul syfrdanol. Uchafbwynt pwysig y daith oedd eu hamser ym Mharc Natur yr Eliffantod, gwarchodfa sy’n achub eliffantod, cathod a chŵn. Gwirfoddolodd y myfyrwyr a gweithion nhw’n galed yn y warchodfa, a oedd yn cynnwys y dasg gofiadwy o rawio baw eliffantod! Roedd y daith yn llwyddiant ysgubol, gyda myfyrwyr yn dangos gwydnwch ac ymrwymiad at wasanaeth, a hynny i gyd wrth greu atgofion parhaol.
Ohio 2026
Ym mis Ionawr 2026, teithiodd grŵp o un ar ddeg o fyfyrwyr o wahanol adrannau i Brifysgol Rio Grande yn Ohio. Roedd y daith yn gyfle unigryw i archwilio sut mae’r Gymraeg yn cael ei dysgu mewn gwlad wahanol ac i ddeall y tebygrwydd a’r gwahaniaethau rhwng diwylliannau Cymru ac America.
Yn ystod y pythefnos, fe wnaethon nhw gymryd rhan mewn gweithgareddau addysgol, trafodaethau gyda myfyrwyr Americanaidd, ac ymweliadau â sefydliadau addysg lleol. Rhoddodd hyn gipolwg gwerthfawr i wahanol systemau addysgol y ddwy wlad. Un uchafbwynt oedd noson arbennig o rannu traddodiadau trwy fynychu Twmpath dawnsio gwerin a dathlu’r Hen Flwyddyn Newydd gyda’r Fari Lwyd.
Dywedodd y myfyrwyr eu bod wedi dysgu llawer am hanes y Cymry yn yr Unol Daleithiau, wedi mwynhau siarad Cymraeg bob dydd, ac wedi gwneud ffrindiau newydd o gefndiroedd academaidd gwahanol. Roedd rhannu eu diwylliant gyda myfyrwyr Americanaidd yn brofiad unigryw a roddodd bersbectif newydd iddynt ar addysg a hunaniaeth ac a’u helpodd i ddatblygu hyder, sgiliau cyfathrebu a balchder yn y Gymraeg.
